شحالكم ....... وشخباركم .... عساكم طيبين ..
اليوم الله يسلمكم ياينكم بشي يديد وهو....
** الفرق ما بين استيشن البنات والشباب **....
يالله نبدا ...
اول شي استيشنات الشباب اسبير فوق ...
لكن البنت تبى شي دلوع اسبير تحت ....
الشباب اتحصل استيشناتهم جير عادي لا و جير 1 مكسور مسكين كان ايداعس و بدال ما ايركبه ف 3 رده واحد من العيله اللي فيه...
البنت طبعا ما اتعرف للجير العادي ولا تبى تتعلم ما فيها ع الكلج مسكينه ف عندها جير تماتيك ...
تعال نشوف البترول طبعا التانكي الصغير مفضي عند الشباب و العود شويه فوق A تقوله ليش ايقولك احسن عشان اخف الوزن يمكن اداعس ويا حد ...
لكن البنت عيب مب التانكيين فل مسكينه افرض طلعت و خلص البترول ...
الشباب اتحصلهم امركبين تواير 900 .. لا و مسحته رايحه ف عينها التواير ههههه و منزلين الموتر و لا رافعينه...
لكن البنت اتحصلها بتواير الوكاله و رنجات الوكاله 17...
الشباب مره اتحصل موترهم بمخفي و مره بدون مخفي عشان ايغيرون شكل الموتر صالخين عمارهم من الحر ...
لكن البنت مخفيها قوي مسكينه اتخاف ع بشرتها ما يستوي اتحطي فير آند لفلي و اتعرض عمرها للشمس يعني ما سوت شي و بعدين يوم بتشوف حد عنده رنج مثلا بتنزل الجامه نص و بطلع شعرها بس بتعب راعي الرنج ...
استيشن الشباب اتحصله و هو طايف ايقول بغغغغغغ ... اتقول موستنج عنده الحبيب ...
لكن البنت تبى هدوء من تسمع حس ف الموتر لو ادناة الدون على طول اتوديه لاخوها ولا ابوها ولا ريلها ...
الشباب اذا حصلت موترهم خربان و طايح ف الوكاله اعرف ان الاستيشن بعده ع الضمان ... ولا من ايخلص الضمان ايخسي ايطب الوكاله ولا الصناعيه ولا مصفح ...
لكن البنت لا منو ايقول لو حتى الليت اخترب على طول الوكاله ...
(( تعالوا انسير داخل الموتر ))
الشباب بتحصل في دبة استيشناتهم كناديرهم و غترهم و نعلتهم عزكم الله ...
اما البنت بتحصلها حاطه دباديب و ورود و عطور بعدها ما استعملتهن و كلهن ماركات و من باريس جلري ...
الثلاجه ههههه طبعا الشباب ولا جنه عندهم ثلاجه كلها سكاريب و ليتات تشتغل ابطارية السياره عشان الفلتر يمكن ايطيح ولا شي و عقب يتوهق لا فج البونيت و عدل بروحك ...
البنت ثلاجتها كلها متروسه سنكرس و جلكسي و مارس و عصير و مدلعه عمرها ...
هههه سدة استيشنات الشباب هههه ما انصحكم تفتحونها كلها استكرات ولا دهن عود منجب من 7 شهور الحبيب ناسي يغسله و بتحصل براغي و هالسوالف و اذا اطور اشوي بتحصل عنده جحال الحبيب يمكن ايواعد ما يحتاي يرد البيت عشان يتجحل ...
البنات تعب بتحصل عندها المكياج و هالسوالف ف السده اتعرفون بعد يمكن واعدت ترد البيت عشان المكياج لا ما يستوي تروح لصحيبها بدون مكياج هههه بيتروع مسكين ما بيبات الليل ف عدتها ف السياره ...
المنظره اللي ف النص اللي تراويك السيايير اللي وراك مال الشباب بتحصل معلق عليها سجين ولا جمجمه ولا عظمه يعني شي ايسبب الرعب ...
البنت بتحصلها معلقه قلب ولا دبدوب صغير و بتحصلها حاطه صورة بنت اخوها الصغيره ولا ولد اختها يعني حد من صغارية البيت ...
هههه تبى اتعرف شو اشرطة الشباب و شو يتسمعون بتحصل عندهم ميحد و بن روغه امسرع و خالد عبدالرحمن ومحمد عبده و بوبكر و علي بحر و اغاني كسرات و هييل مال أول...
البنات طبعا ما يتصوخن هالاشكال بتحصل عندها راشد الماجد و عبدالمجيد و نوال الكويتيه و حمد العامري وعبد الله رويشد
الشباب مازرين الطبلوم ستكرات الحبايب يتحسبون عندهم جيتي ....
اما البنت بتحصلها فارشه شي ع الطبلوم و لا ايكون احمر ولا وردي ...
آخر شي الشباب احسن من البنات ف شي واحد بس و اللي هو انك بتحصل استيشناتهم امغسله و نظيفه و امبلس توايره الحبيب ...
اما البنت هههه الله يعينها بمبرها اللي ورا مكسور مسكينه اخوها كان شال الموتر ف الليل و بركنه غلط و يوم يت تبى اطلع الموتر ما قدرت وردت ع النخله ريوس طبعا هي مب غلطانه لا اخوها ما ايعرف ايبركن و بتحصل موترها في 67 صبغه مسكينه هاك اليوم واحد لاف عليها (ومن هناك هي لافه ع الريال ) و لا مره كانت امطلعه الموتر من البيت و شحفت الباب مب منها بيتهم ضيج و ما فيه مكان ولا هي اتعرف اتسوق ..
و السمـــــــــــــــــــــــوحه ...
يالله ابغي ردودكم يالطيبين ...
تحياتي للجميع
موضوع: الفرق بين استبشن السباب والبنات 
9/8/2008, 1:39 am
